شهداء طوابير العيش

بعيد عن السياسة … وبعيد عن السلام

انا بحب الحكومة ….. وبحب النظام

بس ليا مطلب … بعيد عن الكلام

نفسى ف حته لقمه..او جرعه زكام

بس اسمعنى لحظه.. هتكلم قوام

_______________

وكلامى هيكون كالأتى..

وانا رايح الجامعة يوماتى..

بشوف طوابير العيش

"تخينة" زى حالاتى..

________________

بطلع من بيتى الصبح..

وبعدى طبعاً ع المخبز…

بعنيا بشوف الدبح..

وبلاقى نفسى فى مغرز…

________________

وكمان بشوف طوابير..

بسلاح وسنج ..سواطير..

أسألهم..إيه الحالة ؟؟

بيردوا..العيش بيطير ..

______________

بيطير ازاى يا فصيح..

أنا عايز رد صريح..

راح قالى " بيركب توك توك"

ويطير يسابق الريح..

_____________

وشــــــــوايل متعبية..

و رغيف سخن فى عربية..

أنا شايف ..سامع.. ساكت

بتصوتى ليه يا ولية ؟..

________________

بيقولوا واحد مــــــــــــات..

ده كمان من الكيت كات..

وإخواته هياخدوا بطارو

وهتولع الخناقـــــــــــــــات..

وسلامات .. سلامات .. سلامات

حبايبنا يا "بلديات " ..

تهيس / مدحت الاسوانى