عيد الحب

وكالعادة مينفعش يمر علينا عيد الحب ومنتكلمش عنه بس يا ترى أقولكم ايه مختلف عن كل اللى اتكلموا فى الموضوع ده ؟

تيجوا  نرغى عن تاريخ عيد الحب ؟؟ … ولا نشوف بعض أراء الفقهاء .. وبعض الفتاوى المتعلقه بتحريمه ؟

ولا نتكلم عن مدى أهمية العيد ده للعشاق والمعشوقين ؟ ومين الطبقات اللى بتحتفل بالعيد ده ؟

يلا نجاوب عن الاسئلة دى …..

بيقولوا ان تاريخ عيد الحب يرجع لعصر الرومان … واللى حصل كالاتى .. الامبراطووووور الرومانى أصدر فرمان رخم بمنع الجواز  "تصوروا"منع الجواز

وكان فيه واحد ابن حلال صعب عليه حال الشباب فقرر يجوزهم فى السر … واحد يسألنى ويقولى .. ليه هو كان خطبة؟؟

أرد وأقول … ده كان قديس …. ولما واحد حاقد بلغ عنه مباحث امن الدوله " الرومانيه " طبعا يا عينى اتقفش واتبهدل واتسجن وأخد على قفاه لما قال يا بس …. وفيييييين  يوجعك …… لحد ما اتحكم عليه بالاعدام …. ومن ساعتها احنا بنحتفل باعدامه …قصدى ببطولته

أهو مات فطيس يا ولداه … ومحدش من العشاق نفعوا بحاجه …. تستاهل

————————————————–

تصدقوا ان فيه بعض الفقهاء بيحرموا علينا كمسلمين اننا نحتفل بعيد الحب …. وطبعا انا أقل من انى اقول رأى فى فتواهم عشان كده خلينا بعيد عن الحارة السد  دى ….. مع انى بحتفل بعيد الحب وربنا يسامحنى بقى…..عموما الاعمال بالنيات

_______________________________________

يا ترى بقى العشاق اشمعنى بيستنوا اليوم ده بالذات …. وبيلونوا الدنيا أحمر … ويشتروا فى دباديب صينى رخيصه من ع الرصيف " لامؤاخذة"

أقولكم ؟ ….. هقولكم ….. طبعا دى سهوكه وتلاكيك  …. قال ايه بيفضلوا يهادوا بعض ويخرجوا يستمشوا ع الكورنيش ويروحوا سيتى ستارز

 وهات  يا فشر … وهات يا كدب ….. وطبعا كله بيفركش فى الاخر…الا من رحم ربى.. وطبعا اللى بيحب بجد يدخل البيت من بابو .. مش من المنور …. ويسرح بالبنت الغلبانه اللى مصدقاه…

طبعا مش كل الشباب كده بس أعتقد معظمهم كده……عموما … بقولكم اتقوا الله شويه

_________________________________________

عايزين نعرف بقى مين بالظبط اللى بيحتفل بعيد الحب ؟

يا ترى كل طبقات المجتمع ؟ طبعا لا …. فى ناس رايقه وفايقه … اللهم لا حسد …هى بس اللى بتحتفل وبتجيب هدايا بألافات مؤلفه

وفيه ناس مخنوقه ومدايقه…. اللهم أرحمهم…. من الظروف الاقتصادية الصعبة …ويا دوب بيفكروا هياكلوا ايه النهارده ….

وكل واحد عنده عيد خاص …اما يكون شبعان… دفيان … وعنده رصيد فى الموبايل..

 مش هطول عليكوا وهسيبكوا تحتفلوا……..وكل عام وانتم عشاق ومعشوقين … ويا ريت لو متجوزين

قولوا  امييييييييين